عامل بمدرسة كفر الشيخ: «وزير التعليم رفض إني أنفض إيدي قبل ما يسلم عليا»
كشف رضا يوسف إسماعيل، أحد عمال النظافة بمدرسة حوين للتعليم الأساسي التابعة لإدارة الرياض التعليمية بمحافظة كفر الشيخ، تفاصيل لقائه بوزير التربية والتعليم خلال زيارته للمدرسة، مؤكدا أن الموقف ترك أثرا كبيرا في نفسه وأسعده كثيرا.
وقال رضا خلال تصريحات صحفية: «وأنا بنضف في المدرسة وشغال، لقيت وزير التعليم داخل عليا، مسبنيش واتـفاجأت لقيته جاي يسلم عليا وأنا بنفض إيدي، قالي: لا متنفضش إيدك، ده أنت عندي أحسن من الدنيا كلها».
وأضاف: «بقيت سعيد جدا لما شوفت وزير التربية والتعليم، أنا عندي حاجة وخمسين سنة، بقيت عندي 18 سنة وشباب، وبقيت أني عايز أشتغل ليل ونهار».
وتابع: «ياريت كل يوم الواحد يشوف السيد الوزير، وأبقى قريب ليه وأشوفه، وراجل يستحق أكتر من كده، وربنا يصلح حاله».