سما المصري لـ" الشورى": برنامجي" أهل العلم" اجتماعى يهتم بالدين ولست أهلا للفتوى

◄| أحلم بمساجد للسيدات فقط وخطب تلقيها الحريم

◄| أتعرض للتحرش في الشارع  وفي الوسط الفنى وقصيدة الشاعر صلاح عبد الله جرحتنى

◄| علاقتى بأهلي باتت جيدة وأنا حرة فى اختيار طريقتى في الحياة

سما المصري حالة  من الجدل  المستمر فرضت نفسها علي الساحة بآرائها وتصريحاتها الغريبة ,  احتار الناس في تحديد هويتها هل هي راقصة ام فنانة ام ممثلة ام سياسية.. ثير الجدل حولها من آن لآخر إما بصورها وملابسها المثيرة أو بتعقيبها علي الاحداث الجارية, وموخرا إعلانها عن تقديم  برنامج ديني خلال الشهر الفضيل هذا الحدث الذي قلب السوشيال ميديا  ما بين مؤيد " للراقصة " التي تحولت إلي داعية ومعارض لدخولها هذا المجال  فضلا عن الدعوي القضائية التي رفعت ضددها , التقينا بها وحاورناها لنتعرف منها علي الكثير من الحقائق .

*لماذا اخترت نوعية البرامج الدينية لتقديمها ؟

 **البرنامج بتاعي اجتماعي ديني مش ديني لاني مش اهل ثقة عشان اتكلم في الدين في ناس هي اللي هتفتي في الدين عندها دراية وعلم أكتر عشان كده سميته اهل العلم. 

*لماذا لم تعلني القناة التي سيعرض فيها  البرنامج خلال هذا الشهر ؟

**مفيش قناة هتعرضه فضائيا هاعرضه علي اليوتيوب لان القنوات لها شروط معينة وانا مابحبش حد يفرض عليا شروطه. 

*هل تتوقعين  نجاح البرنامج بعد كل الهجوم ضده؟

**مفروض الناس تنتظر لحين عرض البرنامج ثم  تقرر انا باكدب ولا لا.مفيش حد متوقع النجاح من الفشل بس اللي انا متاكدة منه ان مصر كلها مستنية تشوف البرنامج.

*ردك علي النقد والدعوي القضائية اللي رفعها بعض الشيوخ عليك ؟

*انا مابزعلش من اي هجوم او اي انتقاد طالما في حدود الادب لكن اللي يقل ادبه مش هاسكتله وبالنسبة للدعاوي القضائية فدي ناس غاوية شهرة وانا اتعودت علي كده خلاص من زمان وماباعبرش حد فيهم لان غرضهم معروف وهو الشهرة علي حساب اسمي وخلاص.

*يقال انك ترغبين في إثارة  الجدل والاضواء حولك من اجل الشو فقط؟

**ولو انا باحب اثير الجدل فعلا ذي ما بيقولوا وبانجح في كده فهم لازم يرفعوا لي القبعة لاني باعمل اللي هم بيحاولوا يعملوه ومش عارفين في ناس كتير بتحاول تعمل شو لنفسها باي طريقة وبتفشل. 

*ألا تخافين من رد فعل الإرهابيين  ضدك؟

**بالنسبة للإرهابيين  هم اصلا الاخوان مش مهتمين بموضوع الدين اوي بدليل انهم كانوا ايام حكمهم لمصر بيعملوا حفلات لدوللي شاهين بلبس عريان وبيزودوا تراخيص كباريهات شارع الهرم فهم كل اللي يهمهم مصالحهم السياسية فقط وبالنسبة للسلفين مايختلفوش كتير عنهم واللي عايز يعمل حاجة يتفضل يعملها انا مابيفرقش معايا.

*البعض يراك متناقضة في صورك ولبسك المثير وارتدائك الحجاب وتقديمك برنامجا دينيا ؟

*انا مش متناقضة ولا حاجة صوري اللي بيشوفوها مثيرة دي حياتي الشخصية وانا حرة فيها والبرنامج دا دور معين كمذيعة طالعة اقدمه ع الشاشة قدام الناس وهو مش ديني هو بيناقش قضايا اجتماعية من منظور ديني وانا مجرد مذيعة فقط.

وانا اخترت برنامج بالشكل دا عشان انا عايزه اعمل كده ومحدش له يتدخل ويقولي اعمل ايه ومااعملش ايه هم ليهم انهم يتفرجوا ع البرنامج ولو مش عاجبهم حاجه بعد مايتعرض يبقوا يعترضوا وبرضو بشكل محترم لاني مش هاسمح لحد يغلط فيا. 

*سما المصري الناس تريد أن تفهم  هل انت راقصة أم مغنية أم مذيعة أم  سياسية ؟

**انا فنانة باغني وبامثل بس مش رقاصة لاني عمري مارقصت .

*مش ندمانة علي عمرك اللي ضاع بدون ما تحققي هدف نافع ؟

**العمر اللي ضاع مني انا عملت فيه اسم ماتحلمش اي واحدة تعمل اسم زيه لان في فنانات كتير لهم اعمال كتيرة جدا بس لما تطرحي اسمهم في الشارع محدش بيعرفهم لانهم ملهمش بصمة قدام الناس وبعدين انا عملت اغاني فنية سياسية كتير معلمة عند الناس لحد دلوقتي من ايام قناة فلول ازاي باه ماعملتش اعمال فنيه اومال الاغاني دي ايه؟؟ماانا اصلا مطربة والناس لحد دلوقتي لسه فاكره الاغاني دي. 

*هل تنازلت عن حلم الزواج والامومة ؟

**الجواز دا قسمة ونصيب وانا جربت حظي مرة كزوجة وفشلت في الجواز اما الاطفال فدول نصيب لو ليا نصيب اخلف هاخلف مليش يبقي ربنا مش رايد.

*ماهو أكثر شيء يجذبك  في الرجل؟ 

انا بحب الراجل الحنين الكريم مش الراجل اللي يعامل الست بعنف وشدة. 

*ايه الحاجة اللي لو الزمن رجع بيكي متعمليهاش؟ 

**انا الحمد لله في الفن ماندمتش علي حاجة لاني راضية عن كل اللي عملته لكني ندمانة في حياتي الشخصية علي ناس ماكانوش محل ثقة وندمت اني  في قرارات كتيرة كنت باخاف اخدها وانفذها عشان كنت باخاف من كلام الناس ولو رجع الزمن تاني اعمل الحاجات دي لان الناس كده كده بتتكلم ومحدش بينفع حد.

*هل مازالت علاقتك بأهلك متوترة  ؟

**اهلي الاول كانوا معترضين علي دخولي الوسط الفني فعلا بس مش عشان حاجة هم كانوا معترضين علي دخولي الوسط عشان كانوا خايفين عليا من الاخوان لان بداياتي الاول كانت اغانيا ضد الاخوان فكانوا خايفين لا الاخوان يعملوا فيا حاجة وحشة بس مش اكتر واخويا مااعترضش علي خلعي الحجاب هو قالي انتي حرة في دينك ربنا اللي هيحاسبك لكن دلوقتي بقوا عادي وماما عايشة معايا.

*هل تعرضت سما المصري للتحرش  ؟

**بالنسبة للتحرش دا عادي وبيحصل مع اي واحدة حتي المنقبة لان اخلاق الناس بقت وحشة اوي ومابقاش يهمهم هي لابسه ايه عشان يتحرش بيها المهم هو شايفها حتة لحمة وخلاص وحقه انه يتحرش ويجرح فيها

*اكتر نقد جرحك ؟

**فعلا قصيدة الشاعر صلاح عبد الله هي اكتر حاجة ضايقتني في الحياة لانه مايصحش يتكلم عن الموت كده مهما كانت مين اللي بيتكلم عليها دي لازم يحترم حرمة الموت شويه وبالنسبة للنقد انا قلتلك انه مفيش حاجة بتضايقني من النقد غير النقد اللي فيه تجاوز وقلة ادب اي نقد بعد كده اكيد الواحد بيستفيد منه مهما ان كان. 

*هل تفكر سما المصري بارتداء الحجاب  والاعتزال ؟

**وممكن اكيد طبعا وبافكر في دا كتير اني البس الحجاب وانا باحب الحجاب بس مش قادرة البسه دلوقتي يمكن لما ربنا يريد وعمري ماهاتحجب عشان راجل يقولي البسي حجاب واقعدي في البيت انا يوم مااتحجب اتحجب عشان مقتنعة بيه عشان خاطر مااقلعهوش تاني زي اول مرة وربنا يهدي يا رب.

 *ماهو رد فعلك  عند التحرش بك وخصوصا من الوسط الفني؟ 

**مفيش تقريبا حد تحرش بيا صراحة لو في الشارع بيرمي كلمة ويطلع يجري قبل مااقلع اللي في رجلي واضربه بيه وعادة مابيبقاش عارفني لاني لما بانزل الشارع بابقي متنكرة شوية عشان التصوير فهو بيعاكس اي حتة لحمة وخلاص وبالنسبة للوسط الفني فانا اتعرضت للتحرش من منتجين ومخرجين كتير بس اخدوا علي قفاهم مني وماطالوش مني حاجة عشان كده معظم الوقت انا بانتج أعمالي  بنفسي وكمان عملت قناة .

*وماهي أحلامك للست المصرية  ؟

**نفسي اعمل للست جوامع يخطبوا للستات بس فيها زي بدل ماكل الجوامع اللي بيخطب راجل لان احيانا الست بتبقي اشطر وتعرف تتكلم في الدين احسن من رجالة كتير بس مااعرفش هو دا حلال ولا حرام ان الست تبقي خطيبة في جامع ويكون الجامع كله ستات برضو....ياريت ينفع وانا اعملهم جامع من الصبح بس مش عارفة ينفع ولا لا.

لان الست دلوقتي مفروض تتساوي مع الراجل ف كل حاجة وربنا كرمها زي الراجل بالظبط.

*بعدت عن السياسة خوفا ممن ؟

**انا عمري مادخلت ف السياسة الا باغانيا بس كنت باعمل اغاني فنية سياسية ولما اترشحت لمجلس الشعب اترشحت نزولا علي طلب الجماهير انا ماكنتش عايزة وبس خلاص طلقت السياسة بالثلاثة.

*تتمني مين كان يقدمك معاكي البرنامج ؟

**كنت اتمني خالد الجندي يقدم معايا البرنامج اصله دمه خفيف في عرض القضايا غير اي شيخ تاني .

*توصفي تامر أمين  بايه ؟

**تامر امين بوشين وبيظهر بالليل بوش الراجل الفري اللي بيخرج معانا ويسهر ويعربد ويعرف حريم وبالنهار بوش الراجل التقي المؤمن بتاع ربنا اللي مابيحبش الحال المايل. 

*توصفي مرتضي منصور بايه ؟

**مرتضي منصور ربنا يهديه ويبطل يتوصي بالامهات شويه لانه اكتر واحد دايما فاكر الام في حضورها وغيابها مابينساش ام حد ابدا وعايزه اقوله الدنيا مش دايمه لحد والمناصب لو كانت دايمه لغيرك ماكانتش جاتلك ومحدش هيتحاسب معاك قدام ربنا ولا هيتسأل عنك بطل شتيمة في خلق الله كل واحد له يوم وفرعون ربنا هده اهدي شويه ع الناس انت مش فوق القانون وهيجي يوم تتحاسب علي كل حاجه غلط عملتها.