12:00 | 12 مايو 2017
رئيس مجلسى الإدارة و التحرير
محمود الشويخ

ازاي تتخلصي من انقسام أطراف الشعر بطرق طبيعية من غير ما تقصيه

السبت 06/يناير/2018 - 02:41 م
صورة أرشيفية
صورة أرشيفية
ايمان يوسف
طباعة
مشكلة انقسام اطراف الشعر واحدة من اكتر المشاكل اللي كتير من البنات بيعانوا منها, ومع الوقت كمان المشكلة بتتطور وبيبدأ الشعر كله يبقى تالف, وغالبا معظم البنات الحل الاسرع اللي بيروحوا له في الحالة دي هي قص اطراف الشعر، هل ممكن نتخلص من انقسام اطراف الشعر من غير ما نقصه وناخد من طوله ؟ اكيد ممكن وده اللي هنقوله النهاردة لكل بنات حوا من خلال موضوعنا هنتعرف على علاج انقسام اطراف الشعر بطرق طبيعية هتساعدك على حل المشكلة من غير قص الشعر.

– اسباب انقسام اطراف الشعر:
انقسام اطراف الشعر ده دليل على أن شعرك بيعاني من نقص تغذية وجفاف, وفي حالة جفاف الشعر المزمن بتبدأ الاطراف تنقسم لاتنين او تلاتة او اكتر والشعر بيبقى ضعيف جدا,،طيب ايه هي الاسباب الرئيسية اللي بتسبب المشكلة دي.

1- غسل الشعر يوميا بمية سخنة اوي.

2- التعرض للشمس لفترة طويلة زيادة عن اللزوم.

3- استخدام شامبو يكون مليان مواد كيميائية مضرة, او بلسم او سيروم مش مناسبين لنوع شعرك.

4- مش بتقصي الشعر بانتظام.

5- استخدام الحرارة على الشعر بانتظام من مكوى وسيشوار, ده مع الوقت بيخلي الشعر يبقى جاف وبيأدي لانقسام الاطراف.

6- تسريح الشعر مع تجفيفة بالسيشوار في نفس الوقت ده بيجرد الشعر من الرطوبة الطبيعية.

7- التراكم المفرط لاي منتج على الشعر زي البلسم, السيروم, الموس, السبراي.

8- العوامل البيئية زي التراب, الحرارة, المواد الكيميائية, التلوث.

– علاج انقسام اطراف الشعر بطرق طبيعية:
1- ماسك البيض:
البيض بيحتوي على الاحماض الدهنية الاساسية والبروتينات، والصفار لوحده بيحتوي على الدهون الثقيلة اللي بتساعد على تغذية وتنعيم الشعر, وعلاج انقسام الاطراف.

اخفقي بيضة ضيفي عليها من 2 – 3 معالق صغيرة زيت زيتون, و 2 معلقة صغيرة عسل نحل, اخلطي المكونات كلها مع بعض كويس حطي الخليط على الشعر كله وركزي على الاطراف, سيبيه لمدة 30 دقيقة, وبعدين اغسليه بمية باردة وشامبو كرري الماسك مرتين في الاسبوع لافضل النتايج.

2- ماسك زيت جوز الهند:
زيت جوز الهند يعتبر مرطب طبيعي عميق للشعر,و الميزة فيه انه مناسب لكل انواع الشعر.

على شعر نضيف وجاف, خدي كمية من زيت جوز الهند ودلكي بيها الشعر من الجذور للاطراف, لفي الشعر بفوطة سخنة وسيبيه 20 دقيقة, شيلي الفوطة واستني 10 دقايق كمان، وبعدين اغسليه بشامبو خفيف ممكن نستخدم شامبو جونسون للاطفال, ومع الماسك ده كمان مش هتكوني محتاجة تستخدمي بلسم, كرري الماسك مرة واحدة في الاسبوع.

3- ماسك الافوكادو:
ماسك الافوكادو مش بس بيعالج الانقسام كمان بيغذي الشعر وبيخليه صحي جدا لان الافوكادو بيحتوي على فيتامين E, A, D, بالاضافة للبروتينات والاحماض الدهنية.

هاتي ثمرة افوكادو اهرسيها كويس جدا, وضيفي عليها 2 معلقة صغيرة زيت زيتون, و 2 معلقة صغيرة زيت جوز هند, اخلطيهم كويس مع بعض لحد ما يبقى الماسك ناعم وكريمي, حطي الخليط على الشعر كله والاطراف وسيبيه لمدة 30 دقيقة, وبعدها اغسلي شعرك بمية دافية بس, وابعدي عن البلسم او الشامبو لمدة يوم واحد بعد الماسك بعدها تقدري تغسليه بالشامبو والبلسم عادي, كرري الماسك مرة واحدة في الاسبوع.

4- ماسك زيت الزيتون والعسل:
زيت الزيتون بيحتوي على خصائص طبيعية مغذية للشعر بتساعد على علاج مشكلة انقسام الاطراف, والعسل مرطب طبيعي للشعر.

ضيفي 2 معلقة صغيرة عسل نحل و 4 معالق صغيرة زيت زيتون, اخلطيهم كويس مع بعض, حطي الخليط على الشعر من الجذور للاطراف, سيبيه لمدة من 20- 30 دقيقة, وبعدين اشطفيه بالمية, وممكن تستخدمي شامبو خفيف او شامبو اعشاب وابعدي عن استخدام الشامبوهات القاسية على الشعر او اللي فيها مواد كيميائية, كرري الماسك مرة واحدة في الاسبوع.

5- ماسك المايونيز:
في الفترة الاخيرة بدأ استخدام المايونيز لكتير من مشاكل الشعر زي القشرة, جفاف الشعر, انقسام الاطراف, وده لان المايونيز بيحتوي على البيض اللي يعتبر مغذي طبيعي للشعر وتحسين حالته.

حطي كمية من المايونيز على الشعر “الكمية حسب طول وكثافة شعرك, سيبيه لمدة 30 دقيقة, اغسليه بالمية الباردة والشامبو, ومتستخدميش مية سخنة, كرري الماسك مرة واحدة في الاسبوع.

6- ماسك البابايا:
البابايا يعتبر مصدر كبير للاحماض الامينية، وغني بمضادات الاكسدة والفيتامينات المفيدة جدا للشعر اللي بتساعد على علاج الانقسام وبتخلي الشعر صحي جدا.

هاتي ثمرة بابايا خدي الجزء اللي جوه اللي فيه اللب اهرسيه, ضيفي لها 4 معالق صغيرة زبادي, قلبي الخليط كويس, حطيه على الشعر لمدة 30 دقيقة, وبعدين اغسليه, كرري الماسك مرة واحدة في الاسبوع.

7- ماسك الموز:
الموز مصدر غني بالفيتامينات والمعادن, ويعتبر من افضل العلاجات لمشكلة انقسام اطراف الشعر اللي هتشوفي بعد استخدامه نتايج ملحوظة جدا حتى للشعر شديد الجفاف والتلف.

اهرسي ثمرة موز ضيفي لها 2 معلقة صغيرة زبادي, و 2 معلقة صغيرة عصير ليمون, قلبيهم كويس مع بعض, حطي الخليط على الشعر كله من الجذور للاطراف, سيبيه لمدة 30 دقيقة, وبعدين اغسليه, كرري الماسك مرة واحدة في الاسبوع.

ونحاول بردو مع الماسكات اننا نمشي على نظام غذائي صحي على قد ما نقدر ونبعد عن الاكلات السريعة او الجانك فود لان النظام الغذائي ليه دور مهم جدا في الحفاظ على صحة الشعر.

شامبو طبيعي تعمليه بنفسك في البيت هيخلي شعرك يطول بشكل سريع جدا.

تابعنا على فيسبوك

تابعنا على تويتر