عسلية يكشف المستور : حدوتة كوهين والمهزوز فى الماركات والمناشىء والفلوز ومدكو الخلبوص مهرب تلاجات العرض اللوز

أتفقت أنا وعسلية منذ بداية كتابة حلقاتنا أن نكون عين الحقيقة فى رصد كل الأحداث وأن نكون الضوء الذى يدق ناقوس الخطر لكافة الأجهزة الرقابية فى مصر وأن نلعب دوراً وطنياً لكشف أى فساد وكل فساد إلا أننى ومع أنتهاء كل حلقة من حلقات عسلية أكتشف أننا نحكى القشور والحقيقة مفزعة ومرعبة وما خفى كان أعظم .. حاولت أن أحكى لكم أهوال ما سمعت لكنى أمام إصرار عسلية على اللت والعجن فى جلسات الشلت البحرية تركته يحكى لكم ويكشف المستور عن حدوتة كوهين والمهزوز فى الماركات والمناشىء والفلوز ومدكو الخلبوص مهرب تلاجات العرض اللوز .. بالتفاصيل المملة.

بُص يا باشا أحنا صحيح بنقول القشور بس عشان الجهات الرقابية تجيب كل اللى فى البطون وتكشف المستخبى والمبطون وبصراحة كل شىء إنكشفن وبان وكله بقى بالألوان واللعب بقى عالمكشوف بعد ما بانت لبة (كوهين) مهرب ماركات الأحذية الكبير وفضيحته اللى بقت بجلاجل ووصلت لفوق لفوق قوى يا باشا بعد الـ 6 حاويات إياهم اللى أتمسكوا فى منفذ الشاحنات عن طريق مباحث أمن الموانى وبعد ما أتدخل المهزوز فوراً بنفسه وبعت لجنة جمركية (خصوصى) لكشف الحاويات وتظبيطها وطريق السلامة يا شربات.

إقفل خاشمك يا واد يا مفترى إياك تجيب سيرة البشوات والبهوات أصحاب عزبة المينا الحرة لصاحبها (المهزوز وشركاه) .. إقفل خاشمك يا واد يا مفترى ده كلام ما يتكتبشى فى جرايد ولا مواقع ولا يتقال عالفضائيات .. ده كلام ما يتقالشى إلا فى هيئة الرقابة الإدارية وجهاز الكسب غير المشروع ومن أين لك هذا يا مبقع ؟ .. إقفل خاشمك يا واد وأسكت يا لسانى مش هما دول الـ 6 حاويات بتوع كوهين يا واد واللى المهزوز كلم مصطفى (مكالمة نص الليل) الشهيرة (على طريقة الغزية لازم تنزل) لما قاله : الحاويات دى لازم تمشى بأى طريقة وبسرعة وأوعى (عمرو بك) يكشف حاجة عشان لو الحاويات دى رجعت باب 30 هنروح كلنا فى داهية .. مش هيا دى الحاويات يا واد يا مفترى اللى كان فيها ماركات أحذية إماراتى وهيا مكتوبة فى الورق صينى .. مش هيا دى الحاويات يا واد اللى أتشكلها (لجنة ملاكى) فى منفذ الشاحنات ضمت (مصطفى وإيهاب وسلامة ويوسف) حاملين المباخر للمهزوز فى كل سبوبة.

يا سلام عليك يا كبيرنا صندوق أسود بجد وبحق وحقيق وتعرف القرد مخبة إبنه فين فى البلد وبما إننا بنتكلم عن كوهين والمهزوز والأسبوعيات اللى شغالة دى من ضمن الحكاية اللى فوق أما بقى الحكاية اللى تحت دى موضوع تانى ولها شكل تانى وحدث ولا حرج يا باشا إن كوهين من المرابطين فى مكتب الشيخ حسنى يعنى شيات وأهوات وأفشخنات لغاية ما المينا تقفل (وأمضى باللتى هى أحسن) وزى ما أنت عارف وأنا عارف والبلد كلها عارفة يا كبير أسبوعية فوق وأسبوعية تحت وعلى رأى بابا (فوق وتحت ويخربيت بتاع الكحك).

لساك شايل فى قلبك السواد يا واد وبتتكلم على الشيخ حسنى وشيات وقهوات وأفشخنات وإمضاءات الشيخ حسنى لـ كوهين ..إقفل خاشمك يا واد ياللى قلبك عامل زى البولاك .. إقفل خاشمك يا واد الحيطان ليها ودان .. إقفل خاشمك يا واد وما تخلنيش أحكيلك على الزغلول الكبير فى فتح شهادات كوهين من أيام حسن زعبولة والتحمير والتشمير واللعب اللى كان فى كل الخطوات لغاية اللعب اللى بيتم مع شطا فى 85 دلوقتى .. إقفل خاشمك يا واد يا مفترى عامل شبورة على إيه مهى المينا كلها كده والجمعية اللى بيلمها وزيزة والعرباوى زى بالظبط الجمعية اللى بيلمها الرمالين والداددين وبتوع الإسكراب وهيا نفسها الجمعية اللى بيلمها شطا فى منفذ تهريب 85 الخارجى وهيا نفسها اللى بيلمها ياشين أتاوة من كل مهربين المنطقة الحرة وهيا هيا الجمعية اللى بيلمها الراضى بقسمته ونصيبه فى الإستثمار وزى ما قولتلك قبل كده (أبوها راضى وأنا راضى .. ملك أنت ومالنا يا فاضى) ؟

والله أنا مكسوف منك يا باشا بقى أنا جى أحكيلك ألاقيك أنت اللى بتحكيلى عالبير وغطاه وبدل بنتكلم على الجمعيات واليوميات والأسبوعيات والشهريات والوسخات هأحكيلك حكاية سواق المهزوز اللى كل يوم يروح السيارات يتظبط ويروح المنطقة الحرة يتظبط أما الواد محروس بتاع المهزوز فبيروح بتعليمات من المهزوز لـ وزيزة أو العرباوى ويعدى على الرمالين ياخد المعلوم وعلبتين المارلبورو أما بقى لو الواد محروس بتاع المهزوز محتاج شاى أو قهوة أو أى لوازم لمكتب المهزوز يروح يعبى شاى سايب مستورد من المستودع العام وأى عصائر مستوردة أو مياه غازية لازم ينوبهم م الحب (رصة) بـ 100 صندوق (وأهو حرام شاربينه و حرام سُحت أكلينه) شوفت الطفاصة معاليك .. !!؟؟ أقولك إيه ولا إيه ولا إيه بس يا باشا أقولك على (مدكو الخلبوص) مهرب التلاجات من بورسعيد ودمياط ولو مش مصدقنى أسأل ساعدتك (عاطف) بنفسك وهوة يحكيك على كل حاجة.

أنت مش عاوز تجيبها البر يا واد يا أبو لسان زالف شاى مستورد إيه وبُن إيه يا واد دى الساحات ذات نفسها متباعة وعلنى والبلد كلها عارفة إيه اللى بيتّلم وإيه اللى بيتدّفع .. لساك شايل فى قلبك السواد يا واد وبتكلمنى عن مدكو الخلبوص مهرب تلاجات العرض وتلاجات المجمدات بميناء دمياط وبورسعيد رايح جاى .. مش هوة ده (مدكو) يا واد اللى لسة ممسوكله حاويتين فى المستودع فيهم (كتر وأسلحة بيضاء) بإسم شركة السلام وأطرمخ عليهم عشان مدكو تبع المهزوز .. مش هوة ده مدكو الخلبوص اللى هرب شفرة السلاح داخل حاوية شركة الرسالة فى فبراير 2017 .. ومش هوة ده مدكو الخلبوص يا واد يا مفترى اللى بيجيب مواتير الخلاط مجهولة المصدر ويلزق عليها إستيكر إيطالى وفرنساوى وأمانى بعد ما تخرج وهوة بردو اللى بيجيب مواتير أوروبى ويخرجها على إنها صينى .. مش هوة ده مدكو الخلبوص اللى بيجيب مواتير الغسالات ويكتبها فى إستمارة الكشف أقل من 90 وات عشان يدفع بند 2% بدل ما يدفع بند 30% لأنها فى الأصل أكتر من 90 وات .. مش هوة ده مدكو يا واد اللى بياكل مال النبى والدولة وبيحلى بالصحابة .. مش هوة ده مدكو الخلبوص يا واد اللى كل شغله بيتمنه ويحمره ويشمره (خضر) بقدرة قادر مش هوة ده يا واد اللى بيجيب كتل فضة ونحاس بالأطنان جوة حاويات العدد والمواتير اللى بتتمن زى الحلاوة عن طريق شطا المنشار وبتخرج زى السكينة فى الحلاوة من باب 35 المينائى .. مش هوة ده مدكو الخلبوص يا واد اللى مظبط نفسه مع لجان سحب العينات بالصادرات والواردات .. مش هوة ده مدكو يا واد يا مفترى اللى مظبط مع عبد الله وهلال ورمضان وحمزة والنجار .. مش هوة ده مدكو الخلبوص اللى بيجيب (عسل جنسى) فى حاويات الأقفال ولو مش مصدقنى أنت أسأل (عاطف) وهوة يقولك .. إقفل خاشمك يا واد وخليها فى سرك وسيب شوية للحلقات الجاية ..!!؟؟